Mooi oomblikke

Elke dag sorg vir sy eie mooi oomblikke. Soos die vier seisoene spog met unieke eienskappe. My spesiale mooi vir die dag was die vere op die kapokhaantjie en hennetjie. Die fraaiste patrone; elke veertjie afsonderlik omlyn, kunstig asof 'n kunstenaar fyntjies met 'n dun kwassie elke strepie omlyn het.

Dit laat my dink aan ons mooi land se unieke streke. Elke streek het sy eie besonderse mooi en nie een is beter of mooier as die ander nie.  Elke plek is wel op 'n ander manier mooi en uniek.

Hier by ons in die boswêreld kan dit wreed warm raak. Warm en droog. Soms so stowwerig dat selfs jou kleintongetjie na 'n rëenbuitjie smag.

 Dan maak God Sy wolkekamers oop en was alles skoon en blink. In 'n ommesientjie verander die wêreld rondom ons in 'n groen paradadys. 'n Fees van groene omring jou. Karee en Olienhout kompeteer met Witstinkhout en Soetdoring en onderlangs pryk varings en grasse in nog meer skakering van groen.

As die son ondergaan, word alles stil in my. Geen foto of skildery kan presies dit weergee wat ons hier beleef. Soos 'n wonderskone geskenk dag na dag ontvang ons hierdie sonsondergange. 'n Beeld om vas te vang en te bêre in die skatkis van ons geheue. 

DIE PLOEG

Ek klief jou sooie vlymskerp oop

die aarde bars ek kraak

sensasie diep en aards ontplof

geure uit die aarde grof 

as jy oopbars onder my

my lemme deur jou gly

tril my skare van plesier

Dit juig in tone ongekend

ek bewe soos ´n dier 

‘wyl ek jou aansig skend.

Ons weet dis tydelik, 

gewasse gaan groei

uit die wonde 

waar jy stofrooi bloei.

Moeder-moedersdag

Een keer per jaar staan ons een dag af om Moeders te vereer. 
En te midde van al die dankies en drukkies en gedeelde oomblikke van liefde is daar die seer. Die seer van onvervulde moederskap. Wanneer almal deel in die mooi en lekkerte van kind en moederskap is daar onderdrukte sugte en blink oë wat skelm afgevee word.

Hoeveel jaar kan ‘n vrou wag en hoop? Onvervuld wag en hoop. Eindelik aanvaar dat hierdie moederskoot leeg sal bly...  as al die opsies deurgeworstel is, nie een vir jou beskore was. 

Die kinderkamer steeds stil en leeg. Dan is Moedersdag nie 'n hartjie- sjokolade-dag.

Maar eendag - in die hemel – sal ons verstaan hoekom Mamma’s met hul arms leeg en harte oorvol liefde moes bly staan. 

En kinders wees, en smagtend na 'n Mamma, saans alleen bed toe moes gaan.

ERFGOED

ERFGOED

Die mense wat ek liefhet

bly diep hier in my hart

soos skakels in ’n ketting

bind ’n band van bloed

ons diepste wese saam.

Herrinnering – ’n goue draad;

geen teespoed, siekte;

selfs die dood

kan ons hiervan beroof.

Van waar, menslief

en waarheen?

Van waar familie

en waarheen nou?

In liefde saam op pad.

Ons erfenis ’n goue pand.

Ons Christenskap

aan moedersknie geleer;

sien ons almal, eendag

soos vandag,

mekaar daar weer!

PROESELTJIES

 Kortverhalebundel verkrygbaar by www.afna.co.za 

'n Bundel sketse oor die alledaagse lewe. Sommige snaaks, soms hartseer. 

Ander sommer net lekker stories oor doodgewone mense.

My loflied van dank vir vandag.

Die Bosveld is toegemaak onder ‘n wolkekombers. Dit reën sag en aanhoudend en elke nou en dan sak daar so lekker harde bui uit. Die bome se blare, die gras, selfs die modder blink. Net soos die mense wat met dowwe oë geloop het, se oë ook nou van blydskap blink.

Ek sê ook dankie vir 'n Lenmarie wat in my lewe gekom het en my verseker het dit is ‘fine’ om na drie jaar nog te rou. Om nie oukei te wees al probeer jy ook hoe hard.

En baie dankie dat my kind so wonderlike baas het. Die Here seën in oorvloed!

Vandag se dankie-porsie

Elke dag het genoeg aan sorge, maar..
daar is so baie om voor dankie te sê!
Vanoggend het die voëls my wakker gejubel
Die natuur juig oor die reën wat geval het.
Ek sê dankie, dankie Heer.